ગોધરા,(પંચમહાલ)
અનુજ સોની
પંચમહાલ જિલ્લા તિજોરી અધિકારીના જણાવ્યા અનુસાર જિલ્લા તિજોરી કચેરી, ગોધરા ખાતેથી IRLA સ્કિમ હેઠળ બેન્ક મારફતે પેન્શન મેળવતા તમામ પેન્શરોએ વાર્ષિક હયાતીની ખાતરી કરાવવાની થાય છે. આ તમામ પેન્શનરોએ જૂન-2020થી ઓગષ્ટ-2020 દરમિયાન સંબંધિત બેન્કમાં રૂબરૂ હાજર થઈને હયાતી અંગેનું ફોર્મ ભરીને તે જ બેન્કમાં આપવાનું રહેશે. તમામ બેન્કમાં હયાતી માટેના નામ અને પી.પી.ઓ. નંબર સહિતના પ્રિ-પ્રિન્ટેડ ફોર્મ ભરીને મોકલી આપવામાં આવ્યા છે. કુટુંબ પેન્શન મેળવતા પેન્શનરોએ આ જ ફોર્મમાં પુનઃલગ્ન કરેલ નથી તેવું દર્શાવીને જવાબદાર અધિકારીશ્રીના સહી/સિક્કા કરાવવાના રહેશે. 50 વર્ષની ઉંમર પૂરી કરેલ મહિલા પેન્શનરોએ આવું પ્રમાણપત્ર આપવું જરૂરી નથી. પરંતુ આવા પેન્શનરોએ પોતાની જન્મતારીખ દર્શાવવાની રહેશે. પરદેશમાં વસતા પેન્શનરોએ હયાતીની ખાતરી માટે જે-તે દેશના વિસ્તારના નોટરીના અસલ સહી/સિક્કા વાળું પ્રમાણપત્ર, પીપીઓ નંબર તથા બેંકનું નામ દર્શાવી મોકલવાનું રહેશે. હયાતિ પ્રમાણપત્ર રજૂ નહીં કરનાર પેન્શનરોને સપ્ટેમ્બર-2020 થી પેન્શનનું ચૂકવણું સ્થગિત કરવામાં આવશે. જેની નોંધ લઈ તમામ પેન્શનરોએ આ સમયમર્યાદાની અંદર હયાતીની ખરાઈ કરાવવા આ યાદીમાં વિનંતિ કરવામાં આવી છે. આ ઉપરાંત, પેન્શનની વાર્ષિક આવકનું પ્રમાણપત્ર https://cybertreasuryuat.gov.in પેન્શન પોર્ટલ પરથી મેળવી લેવા વિનંતી કરાઈ છે.
