રાજપીપળા,(નર્મદા) આશિક પઠાણ :-
ડ્રાઇવર્સ લોન્જમાં વર્તમાનપત્રો –સાહિત્યિક પુસ્તકો- મેગેઝીન જેવી વાંચન સામગ્રી ઉપરાંત ભોજન-અલ્પાહાર- હેન્ડવોશ સાથે સુચારૂં બેઠક વ્યવસ્થા સાથેની વિવિધ સુવિધા ઉપલબ્ધ
કોરોના વોરિયર્સ તરીકે તમામ ડ્રાઇવર્સ-ભાઇઓને આવશ્યક ચીજ વસ્તુઓની રાશન કિટ્સ એનાયત કરી બહુમાન કરાયું
ડ્રાઇવર ભાઇઓ સાથે જિલ્લા કલેક્ટર ડી.એ.શાહના આત્મીયતાસભર સંવાદ-હુંફ સાથે પ્રોત્સાહન જેવા માનવતાસભર અભિગમથી ડ્રાઇવર આલમમાં પ્રસરેલી ખુશીની લ્હેર
નર્મદા જિલ્લા મથકે રાજપીપલા કલેકટર કચેરી-જિલ્લા સેવા સદન સંકુલમાં કાર્યરત વિવિધ સરકારી કચેરીઓમાં ડ્રાઇવર તરીકે ફરજ બજાવી રહેલા વાહનચાલકો માટે જિલ્લા પ્રશાસન દ્વારા સુવિધાસભર તૈયાર કરાયેલ ડ્રાઇવર લોન્જને આજે જિલ્લા કલેકટર શ્રી ડી.એ.શાહે નાંદોદ તાલુકા પંચાયત પ્રમુખશ્રી હરેશભાઇ વસાવા, શહેરના અગ્રણી શ્રી રમણસિંહ રાઠોડ, જિલ્લાના અગ્રણી શ્રી અરવિંદભાઇ પટેલ, જિલ્લા પુરવઠા અધિકારીશ્રી એન.યુ.પઠાણ, જિલ્લા શિક્ષણાધિકારીશ્રી જયેશ પટેલ, નાયબ માહિતી નિયામકશ્રી વાય.આર.ગાદીવાલા અને ચિટનીશ શ્રી એસ.એન.સોની, ડ્રાઇવર્સ-ભાઇઓ વગેરેની ઉપસ્થિતિમાં આનંદ-ઉમંગ-હર્ષોલ્લાસ સાથે ખુલ્લી મૂકાઇ હતી.
અત્રે એ ઉલ્લેખનીય છે કે, જિલ્લા સેવા સદન સંકુલની વિવિધ સરકારી કચેરીઓમાં હાલ ૧૨ જેટલા વાહનચાલકો સેવાઓ આપી રહ્યાં છે અને તેમના તરફથી જરૂરી સુવિધા સહિત ડ્રાઈવર્સ રૂમની બેઠક વ્યવસ્થા પૂરી પાડવા જિલ્લા પ્રશાસનને કરાયેલી રજૂઆતને પગલે જિલ્લા કલેકટરશ્રી ડી.એ.શાહે તુરંત જ આ બાબતે માનવીય અભિગમ રાખીને જિલ્લાના માર્ગ અને મકાન વિભાગ સહિત સંબંધિત અન્ય વિભાગોને જરૂરી સૂચના આપતા માત્ર બે દિવસમાં જ આ સુવિધા ઉપલબ્ધિ સાથે આજે તેનું લોકાર્પણ કરાયું છે.
જિલ્લા સેવા સદન સંકુલમાં કાર્યરત અંદાજે ૩૪ જેટલી જુદી જુદી કચેરીઓમાં ફરજ બજાવતા વાહનચાલક ડ્રાઇવર-ભાઈઓને કચેરી કામકાજના દિવસો દરમિયાન સેવા સદન સંકુલમાં વાહન મૂકીને બેસવા તથા ભોજન-અલ્પાહાર-હેન્ડવોશની સુવિધા સાથે કરાયેલી આ બેઠક વ્યવસ્થાના ભાગરૂપે ઉભી કરાયેલી ફેબ્રીકેટેડ શેડ સાથેની આ ડ્રાઇવર્સ લોન્જમાં ૩ સિટેડ સ્ટીલની કુલ-૪ બેન્ચ, ૧ ઓફિસ ટેબલ, ૧ સેન્ટ્રલ ટિપોઇ, પંખા-લાઈટ, પીવાના પાણીના જગ વગેરે જેવી સુવિધા ઉપરાંત વર્તમાનપત્રો-મેગેઝીન સહિત અન્ય સાહિત્ય, વાંચન-સામગ્રી ઉપલબ્ધ કરવામાં આવી છે. જિલ્લા કલેક્ટરશ્રી ડી.એ.શાહ દ્વારા અંગત રસ લઈને તાત્કાલિક ઉભી કરાયેલી ઉપરોક્ત સુવિધાને લીધે જિલ્લા સેવા સદનના ડ્રાઇવર્સ આલમમાં ખુશીની લ્હેર પ્રસરવાની સાથે તેમના તરફથી આ બાબતે આભારની લાગણી વ્યકત કરાઇ છે.
આ પ્રસંગે જિલ્લા કલેક્ટરશ્રી ડી.એ.શાહ સહિતના અન્ય મહાનુભાવોના હસ્તે કોરોના વોરિયર્સ તરીકે તમામ ડ્રાઇવર્સ-ભાઇઓને આવશ્યક ચીજવસ્તુઓની રાશન કિટ્સ એનાયત કરી તેમનું બહુમાન કરાયું હતું. જિલ્લા કલેક્ટરશ્રી શાહે ડ્રાઇવર-ભાઇઓ સાથે સીધો આત્મીય સંવાદ કરી પરિવારના મોભી તરીકે હૂંફ આપી તેમને પ્રોત્સાહિત કર્યાં હતાં.
રાજપીપલા કલેક્ટર કચેરીના સંકુલ ખાતે ડ્રાઇવર્સ લોન્જ ખુલ્લી મૂક્યા બાદ માધ્યમો સાથેના સંવાદમાં જિલ્લા કલેકટર શ્રી ડી.એ.શાહે જણાવ્યું હતું કે, જિલ્લા સેવા સદન ખાતે ડ્રાઈવર-મિત્રો માટે ઘણા લાંબા સમયથી યોગ્ય વ્યવસ્થાના અભાવની બાબત ધ્યાન ઉપર હતી. જિલ્લા સેવા સદનમાં અલગ-અલગ કચેરીઓ અને તેના અલગ-અલગ અધિકારીઓ કાર્યરત છે અને તેમના ડ્રાઈવર કે પ્યુન-કમ-ડ્રાઈવર ભાઇઓ માટે યોગ્ય વ્યવસ્થાના અભાવે ઉનાળાના તડકામાં અને ચોમાસામાં વરસાદમાં ક્યાં બેસવું તે પ્રશ્નનો હવે સુખદ ઉકેલ આવ્યો છે.
જિલ્લા કલેકટર શ્રી શાહે વધુમાં ઉમેર્યું હતું કે, જિલ્લા સેવા સદન ખાતે અલગ-અલગ ફ્લોર ઉપર વોટર કૂલર અને એકવા ગાર્ડ સાથે પીવાના પાણીની સારામાં સારી વ્યવસ્થા કરવાં ઉપરાંત દરેક ફ્લોર ઉપર સારામાં સારા વોશરૂમ તૈયાર કરી દીધા છે. ડ્રાઈવર-કમ-પ્યુન માટે બેસવાની વ્યવસ્થાના ભાગરૂપે તાત્કાલિક માર્ગ અને મકાન વિભાગ દ્વારા અલગ ડ્રાઈવર લોન્જ-ડ્રાઈવર રૂમ તૈયાર કરવામાં આવ્યો છે. જેમાં આ વાહન ચાલકો માટે બેસવાની, મોબાઇલ ચાર્જીંગની વ્યવસ્થા સાથે વર્તમાનપત્રો-સાહિત્યિક પુસ્તકો – મેગેઝીન જેવી વાંચન સામગ્રી ઉપરાંત અહીં બેસીને ભોજન કરવાની તથા હેન્ડ વોશની વ્યવસ્થા પણ કરાઇ છે એટલે તેઓ એક સારી જગ્યાએ બેસીને પોતાનો સમય પસાર કરી શકે તે પ્રકારની આ સુવિધા ઉપલબ્ધ કરાવતાં “ ટીમ નર્મદા ” અત્યંત હર્ષની લાગણી અનુભવે છે.
ડ્રાઇવર્સ-લોન્જની આ સુવિધા ઉપલબ્ધિ માટેની કામગીરીમાં માર્ગ અને મકાન વિભાગના કાર્યપાલક ઇજનેરશ્રી આઇ.વી.પટેલ અને નાયબ કાર્યપાલક શ્રી પાડવી, જિલ્લા શિક્ષણાધિકારીશ્રી જયેશ પટેલ, જિલ્લા પુરવઠા અધિકારીશ્રી એન.યુ.પઠાણ, નાયબ માહિતી નિયામકશ્રી વાય.આર.ગાદીવાલા, ઇન્ચાર્જ નાયબ મામલતદારશ્રી જે.એસ.જોશી વગેરેનું નોંધપાત્ર યોગદાન રહ્યું છે.
