ગોધરા,(પંચમહાલ) નવાઝ શેખ :-
પુરી: ઓડિશાના પુરીમાં વિશ્વવિખ્યાત ભગવાન જગન્નાથજીની રથયાત્રાનો ગુરુવારથી ભક્તિભાવ સાથે પ્રારંભ થયો હતો. જોકે, પ્રથમ જ દિવસે લાખો શ્રદ્ધાળુઓની ભારે ભીડ વચ્ચે દોડધામ અને ગૂંગળામણની ઘટના સર્જાતા એક શ્રદ્ધાળુનું દુઃખદ મોત થયું હતું, જ્યારે અનેક લોકો ઈજાગ્રસ્ત થયા હોવાનું સામે આવ્યું છે.
રથ ખેંચતી વખતે ભીડમાં સર્જાઈ અફરાતફરી
ભગવાન જગન્નાથજી, ભાઈ બલભદ્રજી અને બહેન સુભદ્રાજીના ભવ્ય રથોને 12મી સદીના શ્રીમંદિરથી બહાર લાવવામાં આવી રહ્યા હતા ત્યારે દર્શન માટે લાખો ભક્તો ઉમટી પડ્યા હતા. ભારે ભીડને કારણે એક શ્રદ્ધાળુને શ્વાસ લેવામાં તકલીફ થતાં તે અચાનક બેહોશ થઈ ગયો હતો. તાત્કાલિક હોસ્પિટલ ખસેડવામાં આવ્યા બાદ ડૉક્ટરોએ તેને મૃત જાહેર કર્યો હતો.
રેસ્ક્યુ ટીમે સંભાળી સ્થિતિ, ઈજાગ્રસ્તોને હોસ્પિટલ ખસેડાયા
ઘટના બાદ સ્પેશિયલ રેસ્ક્યુ યુનિટ (SRU) અને અન્ય બચાવ ટીમોએ તાત્કાલિક કાર્યવાહી હાથ ધરી હતી. ભીડમાં ફસાયેલા લોકોને સુરક્ષિત બહાર કાઢી તમામ ઈજાગ્રસ્તોને પુરી મેડિકલ કોલેજ સહિત નજીકની હોસ્પિટલોમાં સારવાર માટે ખસેડવામાં આવ્યા હતા. પરિસ્થિતિ પર નિયંત્રણ મેળવવા માટે વધારાનો પોલીસ બંદોબસ્ત અને મેડિકલ ટીમો પણ તૈનાત કરવામાં આવી હતી.
શંખનાદ અને જયઘોષ વચ્ચે યાત્રાનો પ્રારંભ
આ અગાઉ પરંપરાગત શંખનાદ, ઝાંઝ અને વાદ્યોના નાદ સાથે રથયાત્રાની શરૂઆત કરવામાં આવી હતી. સૌપ્રથમ ચક્રરાજ સુદર્શનને રથ પર બિરાજમાન કરાયા હતા, ત્યારબાદ દેવી સુભદ્રાજી અને ભગવાન જગન્નાથજીના રથોને વિધિવત પ્રસ્થાન કરાવવામાં આવ્યા હતા. સમગ્ર પુરી શહેર *”જય જગન્નાથ”*ના જયઘોષથી ગુંજી ઉઠ્યું હતું. આ પવિત્ર યાત્રા શ્રીમંદિરથી ગુન્ડિચા મંદિર સુધી નીકળે છે.
ભારે વરસાદથી તંત્ર એલર્ટ મોડમાં
પુરીમાં છેલ્લા 24 કલાક દરમિયાન અંદાજે 200 મીમી જેટલો ભારે વરસાદ નોંધાતા અનેક નીચાણવાળા વિસ્તારોમાં પાણી ભરાઈ ગયા છે. પરિસ્થિતિને ધ્યાનમાં રાખીને પુરી મ્યુનિસિપલ કોર્પોરેશન (PMC)ની ટીમોને 24 કલાક એલર્ટ પર રાખવામાં આવી છે.
મંત્રીએ જાતે કરી સમીક્ષા
રાજ્યના આવાસ અને શહેરી વિકાસ મંત્રી કૃષ્ણ ચંદ્ર મહાપાત્રએ સંવેદનશીલ વિસ્તારોની મુલાકાત લઈને વ્યવસ્થાની સમીક્ષા કરી હતી. તેમણે અધિકારીઓને પાણી ભરાયેલા વિસ્તારોમાં હાઈ-કેપેસિટી પમ્પ કાર્યરત રાખવા તેમજ રથયાત્રાના સમગ્ર માર્ગને સલામત અને અવરજવર માટે યોગ્ય રાખવા સૂચના આપી હતી.
