ગોધરા,(પંચમહાલ) નવાઝ શેખ :-
અમદાવાદ/વડોદરા: હવામાન વિભાગ દ્વારા ગુજરાતમાં આગામી દિવસોમાં ભારેથી અતિભારે વરસાદની આગાહી સાથે રેડ એલર્ટ જાહેર કરવામાં આવ્યું છે. વરસાદની ગંભીર પરિસ્થિતિ અને વિદ્યાર્થીઓની સુરક્ષાને સર્વોચ્ચ પ્રાથમિકતા આપતા અમદાવાદ અને વડોદરા જિલ્લા વહીવટી તંત્રે શુક્રવાર, તા. 31 જુલાઈ, 2026ના રોજ તમામ શાળા-કોલેજોમાં રજા જાહેર કરવાનો મહત્વપૂર્ણ નિર્ણય લીધો છે.
અમદાવાદ જિલ્લા શિક્ષણાધિકારી (DEO) દ્વારા જાહેર કરાયેલા આદેશ મુજબ શહેરના પૂર્વ અને પશ્ચિમ વિસ્તારની તમામ સરકારી, ગ્રાન્ટેડ અને ખાનગી પ્રાથમિક, માધ્યમિક, ઉચ્ચતર માધ્યમિક શાળાઓ, અધ્યાપન મંદિરો તેમજ તમામ કોલેજોમાં શૈક્ષણિક કામગીરી સંપૂર્ણપણે બંધ રહેશે. ભારે વરસાદની સંભાવનાને ધ્યાનમાં રાખીને વિદ્યાર્થીઓને અનાવશ્યક જોખમથી બચાવવા આ નિર્ણય લેવામાં આવ્યો હોવાનું તંત્રે જણાવ્યું છે.
બીજી તરફ વડોદરા જિલ્લામાં પણ હવામાન વિભાગની અતિભારે વરસાદની આગાહીને પગલે જિલ્લા કલેક્ટર ડૉ. અનિલ ધામેલિયા દ્વારા જાહેરનામું બહાર પાડી સમગ્ર જિલ્લામાં તમામ આંગણવાડીઓ, પ્રાથમિક, માધ્યમિક, ઉચ્ચતર માધ્યમિક શાળાઓ, ITI તેમજ કોલેજોમાં એક દિવસ માટે રજા જાહેર કરવામાં આવી છે. આ આદેશ વડોદરા શહેર ઉપરાંત જિલ્લાના તમામ તાલુકાઓને પણ લાગુ પડશે.
જિલ્લા વહીવટી તંત્રે તમામ શૈક્ષણિક સંસ્થાઓના સંચાલકો, આચાર્યો અને શિક્ષકોને સૂચના આપી છે કે રજાની માહિતી WhatsApp, SMS તથા અન્ય ઉપલબ્ધ માધ્યમો દ્વારા તાત્કાલિક વાલીઓ અને વિદ્યાર્થીઓ સુધી પહોંચાડવામાં આવે, જેથી કોઈપણ પ્રકારની ગેરસમજ ઊભી ન થાય.
હવામાન વિભાગે આગામી દિવસોમાં રાજ્યના અનેક વિસ્તારોમાં ભારેથી અતિભારે વરસાદની શક્યતા વ્યક્ત કરી હોવાથી જિલ્લા પ્રશાસને નાગરિકોને પણ સાવચેત રહેવા, અનાવશ્યક મુસાફરી ટાળવા, નીચાણવાળા વિસ્તારોમાં ખાસ તકેદારી રાખવા તેમજ માત્ર સરકાર અને હવામાન વિભાગ દ્વારા જાહેર કરવામાં આવતી અધિકૃત સૂચનાઓનું જ પાલન કરવાની અપીલ કરી છે.
