રાજપીપળા,(નર્મદા),આશિક પઠાણ :-
ઉચ્ચ શિક્ષણ કમિશનર ની કચેરી ગાંધીનગર અને વીર નર્મદ દક્ષિણ ગુજરાત યુનિવર્સિટી સુરત ના આદેશ અનુસાર રાજપીપળા કોમર્સ કોલેજ ખાતે આત્મનિર્ભર ભારત અંતર્ગત વ્યાખ્યાન યોજાયું…
સ્વદેશી થી વિકસિત ભારત વિષય પર ચર્ચા વિમર્શ હાથ ધરી દેશ ને મજબુત બનાવવા ના સંકલ્પ થી વિધાર્થીઓ ને અવગત કરાયા …
રાજપીપળા ની શ્રી રત્નસિંહજી મહિડા કોમર્સ કોલેજ ખાતે આત્મ નિર્ભર ભારત નો કાર્યક્રમ આજરોજ ઉચ્ચ શિક્ષણ કમિશનર ની કચેરી ગાંધીનગર અને વીર નર્મદ દક્ષિણ ગુજરાત યુનિવર્સિટી સુરત ના આદેશ અનુસાર યોજાયો હતો જેમા આત્મ નિર્ભર ભારત ના વિષય ઉપર કોલેજ ના વિદ્યાર્થીઓ ને પાઠ ભણાવવા મા આવ્યા હતા.
રાજપીપળા ની શ્રી રત્નસિંહજી મહિડા કોમર્સ કોલેજ પ્રિ.ડો હિતેશ ગાંધી ના માર્ગદર્શન હેઠળ અમૃત પર્વ: સ્વદેશીથી વિકસિત ભારત’ વિષય પર સેમિનારનું આયોજન કરવામાં આવ્યું હતું. આ સેમિનારનો મુખ્ય ઉદ્દેશ્ય દેશની આઝાદીના ૧૦૦મા વર્ષ (૨૦૪૭) સુધીમાં ભારતને એક વિકસિત રાષ્ટ્ર બનાવવા માટે સ્વદેશીની ભાવનાને કેવી રીતે મજબૂત કરી શકાય તેના પર વિચાર-વિમર્શ કરવાનો હતો.
સેમિનારના મુખ્ય વક્તા પ્રા. ક્રિષ્ણા પટેલ દ્વારા સ્વદેશી વસ્તુની જાગૃતિ વિદ્યાર્થીઓમાં આવે તે હેતુથી ખૂબ જ સરસ વક્તવ્ય આપવામાં આવ્યું હતું. સ્વદેશી ઉત્પાદનો અપનાવવાથી દેશના અર્થતંત્ર, રોજગાર અને તકનીકી વિકાસને કેવી રીતે વેગ મળશે તે અંગેની ચર્ચા પ્રા. હિના માલી દ્વારા કરવામાં આવી હતી. તેમણે ભારતીય સ્ટાર્ટઅપ્સ, નાના અને મધ્યમ ઉદ્યોગો (MSMEs)ની ક્ષમતા પર પ્રકાશ પાડ્યો અને તેમને પ્રોત્સાહન આપવા માટે નીતિગત ફેરફારોની જરૂરિયાત સમજાવી હતી.
સેમિનારમાં શિક્ષણ, કૃષિ, આરોગ્ય અને સંરક્ષણ જેવા ક્ષેત્રોમાં સ્વદેશી તકનીકના મહત્ત્વ પર ઊંડાણપૂર્વક ચર્ચા કરી હતી. યુવાનોને નવીનતા (Innovation) અને ઉદ્યોગસાહસિકતા (Entrepreneurship) દ્વારા ‘વિકસિત ભારત’ના નિર્માણમાં સક્રિય યોગદાન આપવા આહ્વાન કરવામાં આવ્યું હતું.
ચર્ચામાં એ વાત પર ભાર મૂકવામાં આવ્યો કે ‘વિકસિત ભારત’નો અર્થ માત્ર આર્થિક સમૃદ્ધિ જ નહીં, પણ સામાજિક સમાનતા, પર્યાવરણીય સ્થિરતા અને સાંસ્કૃતિક ગૌરવ પણ છે. સ્વદેશી અભિગમ આ તમામ લક્ષ્યોને પ્રાપ્ત કરવામાં ચાવીરૂપ ભૂમિકા ભજવી શકે છે તે અંગેનું જ્ઞાન વિદ્યાર્થીઓને આપવામાં આવ્યું હતું.
સેમિનારના અંતે વિદ્યાર્થીઓ તરફથી પ્રશ્નો કરવામાં આવ્યા હતા અને વક્તા દ્વારા તેના સંતોષકારક જવાબ આપવામાં આવ્યા હતા. સમાપનમાં, આ સેમિનારમાં થયેલા વિચારો અને સૂચનોને ‘વિકસિત ભારત’ના રોડમેપમાં સામેલ કરવા માટેના સંકલ્પ NSS ના પ્રોગ્રામ ઓફિસર અને પ્રિન્સીપાલ ડો. હિતેશ ગાંધી દ્વારા લેવડાવવામાં આવ્યા હતા. સમગ્ર કાર્યક્રમનું આયોજન પ્રા.કિંજલ ત્રિવેદી દ્વારા કરવામાં આવ્યું હતું.