ગોધરા,(પંચમહાલ) નવાઝ શેખ :-
રાષ્ટ્રપતિ ભવનમાં પદ્મ ભૂષણ સ્વીકાર્યા બાદ ગાયિકાએ શેર કરી હેલ્થ અપડેટ, ચાહકોનો વ્યક્ત કર્યો આભાર
નવી દિલ્હી: ભારતીય સંગીત જગતની જાણીતી ગાયિકા અલકા યાજ્ઞિકને કળા ક્ષેત્રે તેમના વિશિષ્ટ યોગદાન બદલ દેશના પ્રતિષ્ઠિત ‘પદ્મ ભૂષણ’ સન્માનથી નવાજવામાં આવ્યા છે. મંગળવારે રાષ્ટ્રપતિ ભવન ખાતે યોજાયેલા પદ્મ પુરસ્કાર સમારોહમાં રાષ્ટ્રપતિ દ્રૌપદી મુર્મૂના હસ્તે તેમને આ સન્માન અર્પણ કરવામાં આવ્યું હતું. આ અવસરે અલકા યાજ્ઞિકે પોતાના સ્વાસ્થ્ય અંગે ભાવુક ખુલાસો કરતા જણાવ્યું કે તેઓ છેલ્લા બે વર્ષથી ગંભીર આરોગ્ય સમસ્યાઓનો સામનો કરી રહ્યા છે.
વીડિયો વાયરલ થતાં ચાહકોમાં ચિંતા
સમારોહ દરમિયાન સામે આવેલા વીડિયોમાં અલકા યાજ્ઞિક મંચ સુધી પહોંચવા માટે એક વ્યક્તિનો સહારો લેતા જોવા મળ્યા હતા. આ વીડિયો સોશિયલ મીડિયામાં વાયરલ થતાં ચાહકો તેમની તબિયત અંગે ચિંતિત બન્યા હતા. ત્યારબાદ ગાયિકાએ સોશિયલ મીડિયા મારફતે પોતાની સ્થિતિ અંગે સ્પષ્ટતા કરી હતી.
‘મુશ્કેલ સમય દરમિયાન ચાહકોનો પ્રેમ મારી શક્તિ બન્યો’
ઇન્સ્ટાગ્રામ પર શેર કરેલી પોસ્ટમાં અલકા યાજ્ઞિકે લખ્યું કે છેલ્લા બે વર્ષથી તેઓ જાહેર જીવન અને કાર્યક્રમોથી દૂર રહ્યા છે. આ સમયગાળા દરમિયાન તેઓ એક ગંભીર સ્વાસ્થ્ય સંકટમાંથી પસાર થઈ રહ્યા હતા. તેમણે જણાવ્યું કે ચાહકોના પ્રેમ, પ્રાર્થનાઓ અને શુભેચ્છાઓએ તેમને આ મુશ્કેલ સમયમાં સતત હિંમત આપી છે.
‘આ સન્માન માત્ર મારું નથી’
પદ્મ ભૂષણ સન્માન અંગે પોતાની લાગણી વ્યક્ત કરતા તેમણે જણાવ્યું કે આ એવોર્ડ માત્ર તેમના નામનો નથી, પરંતુ તેમના દરેક શ્રોતા અને ચાહકનો પણ છે, જેમણે વર્ષો સુધી તેમના ગીતોને પ્રેમ આપ્યો છે. તેમણે કહ્યું કે આ સન્માન તેમના સંગીતપ્રેમી ચાહકોને સમર્પિત છે.
‘ધીમે-ધીમે ફરીથી સામાન્ય જીવન તરફ આગળ વધી રહી છું’
અલકા યાજ્ઞિકે પોતાની પોસ્ટમાં વધુમાં જણાવ્યું કે તેઓ હવે ધીમે-ધીમે સ્વસ્થ થઈ રહ્યા છે અને ફરીથી પોતાના પગ પર ઊભા થવાનો પ્રયાસ કરી રહ્યા છે. તેમણે ભારત સરકાર, રાષ્ટ્રપતિ દ્રૌપદી મુર્મૂ, વડાપ્રધાન નરેન્દ્ર મોદી તથા ગૃહ મંત્રાલયનો આ સન્માન બદલ આભાર વ્યક્ત કર્યો હતો.
પોસ્ટના અંતમાં તેમણે જણાવ્યું કે આ દિવસ તેમના માટે માત્ર એક પુરસ્કાર મેળવવાનો નહીં, પરંતુ લાખો ચાહકોના અવિસ્મરણીય પ્રેમ અને સ્નેહનો અનુભવ કરવાનો દિવસ બની રહ્યો છે.
