ગોધરા,(પંચમહાલ) નવાઝ શેખ :-
દિલ્હી પોલીસની કાર્યવાહી પર ઉઠાવ્યા સવાલ; NEET પેપર લીક મુદ્દે વાતચીતથી ઉકેલ લાવવાની અપીલ
નવી દિલ્હી: જંતર-મંતર પરથી સોનમ વાંગચુકને દિલ્હી પોલીસ દ્વારા સફદરજંગ હોસ્પિટલ ખસેડવામાં આવ્યા બાદ સામાજિક કાર્યકર અન્ના હજારેએ સમગ્ર ઘટનાને લઈને પોતાની પ્રતિક્રિયા આપી છે. તેમણે જણાવ્યું કે, કોઈપણ લોકશાહી દેશમાં આંદોલનને દબાવવાને બદલે સંવાદ દ્વારા ઉકેલ શોધવો વધુ યોગ્ય માર્ગ છે.
’20 દિવસ અનશન કરનારની ધીરજની પરીક્ષા ન લો’
અન્ના હજારેએ કહ્યું કે, સોનમ વાંગચુક સતત 20 દિવસ સુધી ભૂખ હડતાળ પર રહ્યા હતા. આવી સ્થિતિમાં સરકારે તેમની ધીરજની વધુ પરીક્ષા લેવી જોઈએ નહીં. તેમણે ભારપૂર્વક જણાવ્યું કે સરકાર માંગણીઓ સ્વીકારે કે નકારી કાઢે, પરંતુ પ્રદર્શનકારીઓ સાથે ખુલ્લી ચર્ચા કરવી જરૂરી છે.
તેમણે વધુમાં કહ્યું કે, “કોઈપણ મુદ્દાનો કાયમી ઉકેલ માત્ર વાતચીત અને પરસ્પર સમજણથી જ આવી શકે છે. સરકાર પોતાનો પક્ષ પણ રજૂ કરે અને સામેવાળાની વાત પણ સાંભળે, ત્યારે જ યોગ્ય નિર્ણય સુધી પહોંચી શકાય.”
તબિયત બગડતાં હોસ્પિટલમાં કરાયા દાખલ
સોનમ વાંગચુક છેલ્લા 21 દિવસથી જંતર-મંતર પર અનિશ્ચિત મુદતના ઉપવાસ પર હતા. લાંબા સમયથી ઘન ખોરાક ન લેવાને કારણે તેમની તબિયત લથડતાં દિલ્હી પોલીસે મેડિકલ સલાહના આધારે તેમને સફદરજંગ હોસ્પિટલમાં દાખલ કર્યા હતા.
હોસ્પિટલના તબીબોના જણાવ્યા મુજબ લાંબા ઉપવાસના કારણે તેમના શરીરમાં નબળાઈ અને ડીહાઇડ્રેશનના લક્ષણો જોવા મળ્યા હતા. જોકે, હોસ્પિટલમાં દાખલ કરતી વખતે તેઓ સંપૂર્ણ હોશમાં હતા અને તેમના બ્લડ પ્રેશર, પલ્સ તેમજ ઓક્સિજન લેવલ સામાન્ય હોવાનું જણાવાયું છે. હાલ તેઓ તબીબી નિરીક્ષણ હેઠળ છે.
શું છે આંદોલનની મુખ્ય માંગણીઓ?
સોનમ વાંગચુક અને તેમની સાથે જોડાયેલા સંગઠનો NEET પરીક્ષામાં કથિત ગેરરીતિઓ અને પેપર લીક મુદ્દે વિરોધ નોંધાવી રહ્યા છે. પ્રદર્શનકારીઓની મુખ્ય માંગણીઓમાં કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા, નેશનલ ટેસ્ટિંગ એજન્સી (NTA)ની કાર્યપ્રણાલીની નિષ્પક્ષ તપાસ, પેપર લીકની પારદર્શક તપાસ તેમજ સમગ્ર પરીક્ષા પ્રણાલીમાં વ્યાપક સુધારા લાવવાનો સમાવેશ થાય છે.
