ગોધરા, (પંચમહાલ) સાજીદ શેખ :-
10 ઓગસ્ટ સુધી અરજીઓ સ્વીકારાશે, લાંબા સમયથી પડતર પ્રશ્નોના ઝડપી નિરાકરણ માટે નાગરિકોને તક
પંચમહાલ: ગોધરા (ગ્રામ્ય) તાલુકાના નાગરિકોના લાંબા સમયથી પડતર પ્રશ્નોના અસરકારક અને સમયસર નિરાકરણ માટે તાલુકા કક્ષાનો સ્વાગત ફરિયાદ નિવારણ કાર્યક્રમ આગામી **25 ઓગસ્ટ, 2026 (મંગળવાર)**ના રોજ સવારે 11:00 કલાકે યોજાશે.
મામલતદાર કચેરી, ગોધરા (ગ્રામ્ય) દ્વારા જાહેર કરવામાં આવેલી માહિતી મુજબ, નાગરિકો પોતાના સેવાકીય પ્રશ્નો, વહીવટી મુદ્દાઓ તથા અન્ય પડતર અરજીઓ 10 ઓગસ્ટ, 2026 સુધી મામલતદાર કચેરી ખાતે રૂબરૂ અથવા ટપાલ મારફતે મોકલી શકશે. જોકે, કોર્ટ કેસ, રહેમરાહે નોકરી, પેન્શન, નીતિ વિષયક તથા આક્ષેપાત્મક અરજીઓ આ કાર્યક્રમમાં સ્વીકારવામાં આવશે નહીં.
દરેક અરજદારે એક અરજીમાં માત્ર એક જ પ્રશ્ન રજૂ કરવાનો રહેશે. અરજી તથા કવર પર “તાલુકા સ્વાગત ફરિયાદ નિવારણ કાર્યક્રમ” સ્પષ્ટ રીતે લખવાનું રહેશે. અરજીમાં અરજદારનું નામ, સંપૂર્ણ સરનામું તથા મોબાઇલ અથવા સંપર્ક નંબર ફરજિયાત દર્શાવવાનો રહેશે.
સ્વાગત કાર્યક્રમમાં માત્ર લાંબા સમયથી પડતર પ્રશ્નો જ રજૂ કરી શકાશે. તાલુકા કક્ષાના પ્રશ્ન માટે સંબંધિત અધિકારીને અગાઉ કરેલી રજૂઆતની નકલ અરજી સાથે જોડવી જરૂરી રહેશે. કાર્યક્રમ દરમિયાન અરજદારે જાતે રૂબરૂ હાજર રહી પોતાની રજૂઆત કરવાની રહેશે, અન્ય કોઈ વ્યક્તિ અથવા વકીલ દ્વારા રજૂઆત માન્ય રહેશે નહીં.
મામલતદાર, ગોધરા (ગ્રામ્ય) દ્વારા નાગરિકોને સમયમર્યાદામાં અરજી કરી આ કાર્યક્રમનો લાભ લેવા અનુરોધ કરવામાં આવ્યો છે.
