ફતેપુરા, (દાહોદ ) આઝાદ મન્સુરી :-
લીમડા હનુમાન મંદિર ખાતે સફાઈ અભિયાન, વિવિધ સૂત્રો સાથે ગ્રામજનોને સ્વચ્છતા અંગે કરાયા જાગૃત
દાહોદ: દાહોદ જિલ્લાના ફતેપુરા તાલુકામાં ગત *તા. 14 જુલાઈ, 2026 (મંગળવાર)*ના રોજ NSS યુનિટ દ્વારા વડવાસ ગામના લીમડા હનુમાન મંદિર ખાતે એક દિવસીય કેમ્પનું આયોજન કરવામાં આવ્યું હતું. કેમ્પ દરમિયાન સ્વચ્છતા અંગે જનજાગૃતિ ફેલાવવા માટે વિદ્યાર્થીઓ દ્વારા ઉત્સાહભેર સ્વચ્છતા રેલીનું આયોજન કરવામાં આવ્યું હતું.
રેલી દરમિયાન વિદ્યાર્થીઓએ “જ્યાં જ્યાં ગંદકી, ત્યાં ત્યાં માંદગી”, “ગંદકી ભગાવો, રોગ ભગાવો” જેવા પ્રેરણાદાયી સૂત્રોના નાદ સાથે સમગ્ર વડવાસ ગામમાં સ્વચ્છતાનો સંદેશ પહોંચાડ્યો હતો.
રેલી પૂર્ણ થયા બાદ લીમડા હનુમાન મંદિરના પટાંગણમાં સ્વચ્છતા અભિયાન હાથ ધરવામાં આવ્યું હતું. NSSના વિદ્યાર્થીઓએ મંદિર પરિસરમાં ઘાસનું નિંદામણ, રસ્તાઓની સફાઈ, કચરો એકત્રિત કરી સ્વચ્છ વાતાવરણ નિર્માણ માટે શ્રમદાન કર્યું હતું.
સ્વચ્છતા અભિયાન પૂર્ણ થયા બાદ તમામ વિદ્યાર્થીઓએ હાથ-પગ ધોઈ તાજગી મેળવી અને સાથે મળીને ભોજન ગ્રહણ કર્યું હતું. ત્યારબાદ તમામ વિદ્યાર્થીઓ શાળાએ પરત ફર્યા હતા.
આ સમગ્ર કાર્યક્રમનું આયોજન શાળાના આચાર્ય શ્રી ડી. એન. પ્રજાપતિ, NSS યુનિટના કન્વીનર શ્રીમતી આર. ડી. સાદીયા તેમજ સહ-કન્વીનર શ્રી ડી. જે. વણકરના સંયુક્ત માર્ગદર્શન હેઠળ સફળતાપૂર્વક કરવામાં આવ્યું હતું. કાર્યક્રમનો મુખ્ય હેતુ વિદ્યાર્થીઓમાં સ્વચ્છતા, સામાજિક સેવા અને જવાબદારીની ભાવના વિકસાવવાનો હતો.
