ફતેપુરા, (દાહોદ ) આઝાદ મન્સુરી :-
દાહોદ: દાહોદ જિલ્લાના ફતેપુરા તાલુકાના 65 વર્ષીય કાંતિભાઈ રત્નાભાઈ પ્રજાપતિએ અદમ્ય શ્રદ્ધા અને દૃઢ મનોબળનું પ્રેરણાદાયી ઉદાહરણ પૂરું પાડતાં પવિત્ર અમરનાથ ધામ માટે સાયકલ યાત્રાની શરૂઆત કરી છે. તેઓ ફતેપુરાથી અંદાજે 1,600 કિલોમીટરનું અંતર સાયકલ પર કાપીને બાબા બરફાનીના દર્શન કરવા માટે નીકળ્યા છે.
સામાન્ય રીતે આ ઉંમરે લોકો આરામદાયક જીવન જીવવાનું પસંદ કરતા હોય છે, પરંતુ કાંતિભાઈએ પોતાની અડગ આસ્થા અને હિંમતના બળે આ કઠિન યાત્રાનો સંકલ્પ લીધો છે. તેમની યાત્રા દરમિયાન લાંબું અંતર, દુર્ગમ પહાડી માર્ગો, કપરું ચઢાણ અને બદલાતું હવામાન જેવી અનેક પડકારજનક પરિસ્થિતિઓનો સામનો કરવો પડશે.
કાંતિભાઈ જ્યારે ફતેપુરાથી યાત્રા માટે રવાના થયા ત્યારે સ્થાનિક રહેવાસીઓ, આગેવાનો અને શ્રદ્ધાળુઓએ તેમનું ફૂલહાર પહેરાવી ભવ્ય સ્વાગત કર્યું હતું. સૌએ તેમની યાત્રા સફળ અને મંગલમય રહે તેવી શુભેચ્છાઓ પાઠવી હતી.
સ્થાનિક લોકોના જણાવ્યા મુજબ, કાંતિભાઈની આ યાત્રા માત્ર એક પ્રવાસ નહીં પરંતુ તેમની ભગવાન ભોળાનાથ પ્રત્યેની અતૂટ શ્રદ્ધા, વિશ્વાસ અને દૃઢ સંકલ્પનું જીવંત પ્રતીક છે. શ્રદ્ધાળુઓનું માનવું છે કે, “જ્યારે મનમાં ભોળાનાથ પ્રત્યે સાચી ભક્તિ હોય, ત્યારે ગમે તેવો કઠિન માર્ગ પણ સરળ બની જાય છે.”
કાંતિભાઈ પ્રજાપતિની આ અનોખી અમરનાથ સાયકલ યાત્રા હાલ સમગ્ર ફતેપુરા પંથકમાં ચર્ચાનો વિષય બની છે. લોકો તેમના આ સાહસ, આત્મવિશ્વાસ અને ભક્તિભાવને દિલથી બિરદાવી રહ્યા છે.
