ગોધરા,(પંચમહાલ) નવાઝ શેખ :-
સુખોવી નજીક સૈન્ય વાહનને નિશાન બનાવી વિસ્ફોટ; સમગ્ર વિસ્તારમાં સર્ચ ઓપરેશન તેજ, એક સપ્તાહમાં બીજી ઘટના
નાગાલેન્ડ: નાગાલેન્ડના સુખોવી નજીક આસામ રાઇફલ્સના વાહનને નિશાન બનાવી શંકાસ્પદ IED (ઇમ્પ્રુવાઇઝ્ડ એક્સપ્લોઝિવ ડિવાઇસ) બ્લાસ્ટ કરવામાં આવ્યો છે. આ કાયરતાપૂર્ણ હુમલામાં એક જવાન શહીદ થયા છે, જ્યારે ચાર જવાનો ઘાયલ થયા હોવાનું સામે આવ્યું છે. ઘટનાની જાણ થતાં જ સુરક્ષા દળોએ સમગ્ર વિસ્તારને ઘેરી લઈને સઘન સર્ચ ઓપરેશન શરૂ કર્યું છે.
પ્રાપ્ત માહિતી અનુસાર, આ વિસ્ફોટ ચુમૌકેદિમા જિલ્લાના સુખોવી વિસ્તાર પાસે થયો હતો. હુમલા બાદ ઘાયલ જવાનોને તાત્કાલિક નજીકની સૈન્ય હોસ્પિટલમાં સારવાર માટે ખસેડવામાં આવ્યા છે, જ્યાં તેમની સારવાર ચાલી રહી છે.
હુમલા પાછળ કયા ઉગ્રવાદી સંગઠનનો હાથ છે તે અંગે હજુ સુધી સત્તાવાર પુષ્ટિ કરવામાં આવી નથી. જોકે, સુરક્ષા એજન્સીઓ તમામ પાસાઓને ધ્યાનમાં રાખીને તપાસ ચલાવી રહી છે.
ઉલ્લેખનીય છે કે, એક જ સપ્તાહમાં આસામ રાઇફલ્સને નિશાન બનાવી થયેલો આ બીજો IED બ્લાસ્ટ છે. આ ઘટનાને પગલે સમગ્ર વિસ્તારમાં હાઈ એલર્ટ જાહેર કરવામાં આવ્યું છે અને સુખોવી તથા આસપાસના જંગલ વિસ્તારોમાં સુરક્ષા દળો દ્વારા સંયુક્ત સર્ચ ઓપરેશન હાથ ધરાયું છે.
સુરક્ષા એજન્સીઓ હુમલાખોરોને શોધવા માટે સતત કાર્યવાહી કરી રહી છે, જ્યારે ઘટનાના ચોક્કસ કારણો અને જવાબદારો અંગે વધુ તપાસ ચાલુ છે.
