ગોધરા,(પંચમહાલ) સાજીદ શેખ :-
પંચમહાલ જિલ્લામાં શાળાઓ માટે ખરીદાયેલા શૈક્ષણિક સાધનોમાં કરોડો રૂપિયાનું ગેરવહીવટ અને ભ્રષ્ટાચાર બહાર આવતા પોલીસ દ્વારા ગંભીર ગુનો નોંધાયો છે. સમગ્ર મામલે લાંબા સમયથી ચાલી રહેલી ગેરરીતિઓનો ભંડાફોડ થતાં તંત્રમાં હડકંપ મચ્યો છે.
FIR મુજબ વર્ષ 2024થી 2026 દરમિયાન વિવિધ શાળાઓ માટે સ્માર્ટ પેનલ, લેપટોપ, એન્ટી વાયરસ, યુપીએસ અને અન્ય ઈલેક્ટ્રોનિક સાધનોની ખરીદીના નામે લાખો નહીં પરંતુ કરોડો રૂપિયાની લેવડદેવડ કરવામાં આવી હતી. પરંતુ તપાસ દરમિયાન બિલ, સ્ટોક અને વાસ્તવિક સપ્લાય વચ્ચે મોટા તફાવતો સામે આવ્યા છે.
આ મામલે મુખ્યત્વે J.S. Computer, Godhra, Vedika Enterprise, Rajkot, Shree Ram Enterprise, Rajkot, Akshar Safety Products, Rajkot સહિતની કંપનીઓના નામ સામે આવ્યા છે, જેમની મારફતે વિવિધ ખરીદીના બિલો બનાવવામાં આવ્યા હોવાનું તપાસમાં બહાર આવ્યું છે.
દસ્તાવેજોમાં દર્શાવ્યા મુજબ સ્માર્ટ પેનલ, લેપટોપ, હાર્ડ ડિસ્ક, સેફ્ટી ઈક્વિપમેન્ટ અને એન્ટી વાયરસ સોફ્ટવેર માટે લાખો રૂપિયાના બિલો તૈયાર કરવામાં આવ્યા હતા. પરંતુ સ્થળ પર ચકાસણી દરમિયાન ઘણી સામગ્રી ઉપલબ્ધ નહોતી અથવા તેનો યોગ્ય ઉપયોગ થયો ન હોવાના પુરાવા મળ્યા છે.
તપાસમાં આ પણ ખુલ્યું છે કે કેટલીક ખરીદી માટે DBTR (Debit Transaction Reference) દ્વારા ચુકવણીઓ કરવામાં આવી હતી, પરંતુ તેના બદલામાં મળેલ સામગ્રી અને દસ્તાવેજોમાં ગેરમિલ જોવા મળ્યો છે. જેના કારણે આ સમગ્ર વ્યવહાર શંકાસ્પદ બન્યો છે.
આ કૌભાંડમાં સંકળાયેલા તરીકે અનેક શખ્સોના નામ પણ સામે આવ્યા છે, જેમાં સંચાલકો અને જવાબદાર વ્યક્તિઓની ભૂમિકા તપાસ હેઠળ છે. પ્રાથમિક રીતે ગેરરીતિઓમાં સંડોવણી માટે આરોપીઓ સામે કાયદેસરની કાર્યવાહી શરૂ કરવામાં આવી છે.
પોલીસના જણાવ્યા મુજબ આ માત્ર શરૂઆત છે અને આગળની તપાસમાં વધુ મોટા ખુલાસા થવાની શક્યતા છે. તંત્ર દ્વારા તમામ નાણાકીય લેવડદેવડ, બિલો અને સપ્લાય ચેઇનની સઘન તપાસ કરવામાં આવી રહી છે.
આ સમગ્ર મામલે પ્રશ્ન ઉઠી રહ્યો છે કે શાળાઓ માટે ફાળવાયેલા નાણાંનો દુરુપયોગ કરીને કોના હિતમાં આ ગેરરીતિ કરવામાં આવી અને આમાં કયા અધિકારીઓ અથવા સપ્લાયરોની સંડોવણી હતી.
પોલીસે સ્પષ્ટ કર્યું છે કે દોષિતોને છોડવામાં નહીં આવે અને જાહેર નાણાં સાથે થયેલા આ પ્રકારના ગેરવહીવટ સામે કડક કાર્યવાહી કરવામાં આવશે.