શહેરા, (પંચમહાલ) ઇમરાન પઠાણ :-
શહેરા, પંચમહાલ: શહેરા પોલીસ સ્ટેશન વિસ્તારમાં નિવૃત્ત શિક્ષક સાથે થયેલા લાખો રૂપિયાના લોન ફ્રોડ કેસમાં શહેરા પોલીસને મોટી સફળતા મળી છે. પોલીસે અમદાવાદના વસ્ત્રાલ વિસ્તારમાંથી આ કેસના મુખ્ય **‘કોલર’ વિપુલભાઈ ઘનશ્યામભાઈ પટેલ (સોરઠીયા)**ની અટકાયત કરી છે.
પંચમહાલ-ગોધરા રેન્જના નાયબ પોલીસ મહાનિરીક્ષક વિધિ ચૌધરી (IPS) અને પંચમહાલ જિલ્લા પોલીસ અધીક્ષક **ડો. હરેશભાઈ દુધાત (IPS)**ની સૂચના તથા નાયબ પોલીસ અધીક્ષક બ્રિન્દા જાડેજાના માર્ગદર્શન હેઠળ પોલીસે આ કાર્યવાહી હાથ ધરી હતી.
શહેરા તાલુકાના ગુણેલી ગામના નિવૃત્ત શિક્ષક ચંદ્રસિંહ રણજીતસિંહ જાદવને ₹10 લાખની લોનની જરૂર હોવાથી આરોપીઓએ લોન અપાવવાનો વિશ્વાસ આપી તેમના દસ્તાવેજો મેળવ્યા હતા. ત્યારબાદ લોન ચાર્જના નામે ₹1,17,000 તેલંગાણાના મધાપુર સ્થિત એક્સિસ બેંકના ખાતામાં ટ્રાન્સફર કરાવી છેતરપિંડી કરવામાં આવી હતી.
આ મામલે શહેરા પોલીસ સ્ટેશનમાં BNS 2023ની કલમ 317(2), 318(3)(4) તથા IT એક્ટ હેઠળ ગુનો નોંધવામાં આવ્યો હતો.
અમદાવાદથી મુખ્ય ‘કોલર’ ઝડપાયો
શહેરા પોલીસ ઇન્સ્પેક્ટરની સૂચના હેઠળ પો.સ.ઇ. એસ.આર. શર્મા અને સર્વેલન્સ ટીમે ટેકનિકલ તથા હ્યુમન સોર્સની મદદથી અમદાવાદના વસ્ત્રાલમાંથી વિપુલભાઈ ઘનશ્યામભાઈ પટેલ (સોરઠીયા), મૂળ રહે. મોડા, તા. મહુવા, જી. ભાવનગરની અટકાયત કરી હતી.
પોલીસે આરોપી પાસેથી ગુનામાં ઉપયોગમાં લેવાયેલ સીમકાર્ડ અને મોબાઇલ ફોન કબજે કર્યા છે.
બોટાદમાં પણ ₹2.30 લાખની છેતરપિંડી
તપાસ દરમિયાન સામે આવ્યું કે આરોપીએ આ જ પદ્ધતિથી બોટાદ ટાઉન પોલીસ સ્ટેશન વિસ્તારમાં એક નાગરિક સાથે ₹2,30,000ની છેતરપિંડી કરી હતી. શહેરા પોલીસે આરોપીને સબ જેલ, ગોધરા ખાતે મોકલી આપ્યો છે અને બોટાદ પોલીસને ટ્રાન્સફર વોરંટથી તેનો કબજો મેળવવા જાણ કરવામાં આવી છે.
બે આરોપી હજુ વોન્ટેડ
તપાસમાં ગ્રાહકોનું લિસ્ટ આપનાર રમેશભાઈ ત્રિવેદી હાલ ફરાર હોવાનું સામે આવ્યું છે. ઉપરાંત, તેલંગાણાના એક્સિસ બેંક ખાતામાં Google India Digital Services Private Limited નામનું ખાતું ખોલાવવામાં USAના બે નાગરિકો જેનિફર ક્રિસ્ટોપર કીર્ક અને વિલ્સન લુગ માવ ત્સાઈ તેમજ ભારતીય નાગરિક સિંઘાર્થ હરિ લક્ષ્મીનારાયણ મુન્દ્રા સંકળાયેલા હોવાનું તપાસમાં સામે આવ્યું છે.
પકડાયેલ આરોપી:
- વિપુલભાઈ ઘનશ્યામભાઈ પટેલ (સોરઠીયા), રહે. વસ્ત્રાલ, અમદાવાદ
વોન્ટેડ આરોપીઓ:
- રમેશભાઈ ત્રિવેદી
- એક્સિસ બેંકનો ખાતાધારક
પોલીસ દ્વારા સમગ્ર કેસમાં બેંક ટ્રાન્ઝેક્શનની ઊંડાણપૂર્વક તપાસ હાથ ધરવામાં આવી રહી છે.
