ફતેપુરા, (દાહોદ ) આઝાદ મન્સુરી :-
ફતેપુરા, દાહોદ: ફતેપુરા ખાતે અખિલ ભારતીય રાષ્ટ્રીય શૈક્ષણિક મહાસંઘ, ફતેપુરાના આયોજન હેઠળ કલાલ પાર્ટી પ્લોટ ખાતે ગુરુ વંદન કાર્યક્રમનું શ્રદ્ધાભેર અને ભાવનાત્મક વાતાવરણમાં આયોજન કરવામાં આવ્યું હતું. ભારતીય સંસ્કૃતિમાં ગુરુને આપવામાં આવેલા સર્વોચ્ચ સ્થાન અને ગુરુ પ્રત્યે કૃતજ્ઞતા વ્યક્ત કરવાના ઉદ્દેશ્યથી યોજાયેલો આ કાર્યક્રમ સૌ માટે પ્રેરણાદાયી રહ્યો હતો.
કાર્યક્રમમાં બ્રહ્માકુમારી સંસ્થા તરફથી પૂજ્ય નીતા દીદી, તાલુકા પ્રાથમિક શિક્ષણ અધિકારી, ફતેપુરા, BRC કો-ઓર્ડિનેટર ફતેપુરા તેમજ શાળા વિકાસ સંકુલ ફતેપુરાના આચાર્યશ્રીઓ સહિતના મહાનુભાવોની વિશેષ ઉપસ્થિતિ રહી હતી. ઉપસ્થિત મહાનુભાવોએ ગુરુના જીવનમૂલ્યો, સંસ્કાર અને શિક્ષણ ક્ષેત્રે તેમના અમૂલ્ય યોગદાન અંગે પ્રેરણાત્મક માર્ગદર્શન આપ્યું હતું.
કાર્યક્રમમાં મુખ્ય વક્તા તરીકે ધીરેનભાઈ જોશીએ વિવિધ ઉદાહરણો દ્વારા ગુરુ-શિષ્ય પરંપરાના મહત્ત્વને સમજાવ્યું હતું અને આ પરંપરાને વધુ અસરકારક તથા જીવંત બનાવવા પર ભાર મૂક્યો હતો.
આ પ્રસંગે જિલ્લા સંગઠનના અધ્યક્ષ, સંગઠન મંત્રી સહિત અન્ય હોદ્દેદારોએ પણ ઉપસ્થિત રહી શિક્ષણ તથા સંગઠન સંબંધિત વિવિધ મુદ્દાઓ અંગે માર્ગદર્શન પૂરું પાડ્યું હતું. કાર્યક્રમમાં મોટી સંખ્યામાં શિક્ષકમિત્રો, શિક્ષણપ્રેમી નાગરિકો અને માતૃશક્તિ જોડાયા હતા, જેના કારણે સમગ્ર કાર્યક્રમ ભક્તિમય અને સ્નેહસભર વાતાવરણમાં યોજાયો હતો.
આયોજકો દ્વારા જણાવાયું હતું કે સમાજમાં શિક્ષણ, સંસ્કાર અને ગુરુ પ્રત્યેની શ્રદ્ધાની ભાવના વધુ મજબૂત બને તે હેતુથી કાર્યક્રમનું આયોજન કરવામાં આવ્યું હતું. કાર્યક્રમના અંતે ઉપસ્થિત સૌએ ગુરુજનોના આશીર્વાદ મેળવી સમાજહિત અને રાષ્ટ્રહિત માટે કાર્ય કરવાની પ્રતિજ્ઞા લીધી હતી.
