ગોધરા,(પંચમહાલ) નવાઝ શેખ :-
ગોધરા: પંચમહાલ જિલ્લા પોલીસ હેડક્વાર્ટર ખાતે જિલ્લા પોલીસ પરિવાર તથા દારૂસસુલહ વલ ખેરના સહયોગથી મહેંદી સ્પર્ધાનું ભવ્ય આયોજન કરવામાં આવ્યું હતું. સાંસ્કૃતિક એકતા અને સામાજિક સૌહાર્દના સંદેશ સાથે યોજાયેલી આ અનોખી સ્પર્ધામાં મોટી સંખ્યામાં બહેનો, ખાસ કરીને મુસ્લિમ સમાજની બહેનોએ ઉત્સાહભેર ભાગ લીધો હતો.
નાયબ પોલીસ અધિક્ષક બ્રિન્દા જાડેજાએ જણાવ્યું હતું કે કાર્યક્રમનો મુખ્ય હેતુ પોલીસ પરિવાર અને સ્થાનિક સમાજ વચ્ચે સુમેળ વધારવાનો તેમજ મહિલાઓને પોતાની કળા રજૂ કરવા માટે મંચ પૂરો પાડવાનો હતો.
સ્પર્ધામાં બહેનોએ પરંપરાગત તેમજ આધુનિક નમૂનાઓની આકર્ષક મહેંદી ડિઝાઇન રજૂ કરી પોતાની સર્જનાત્મકતાનું સુંદર પ્રદર્શન કર્યું હતું. વિવિધ ડિઝાઇનમાં ભારતીય સંસ્કૃતિ, તહેવારોના રંગો અને કળાત્મક અભિવ્યક્તિનું જીવંત પ્રતિબિંબ જોવા મળ્યું હતું.
સ્પર્ધાના અંતે શ્રેષ્ઠ પ્રદર્શન કરનાર બહેનોને રોકડ પુરસ્કાર અને પ્રમાણપત્ર આપી સન્માનિત કરવામાં આવ્યા હતા. પુરસ્કાર વિતરણ પ્રસંગે ડીવાયએસપી બ્રિન્દા જાડેજા વિશેષ ઉપસ્થિત રહ્યા હતા અને બહેનોની કળા તથા કુશળતાની પ્રશંસા કરી હતી.
‘આવી પ્રવૃત્તિઓ સમાજમાં એકતા અને વિશ્વાસ મજબૂત બનાવે છે’
બ્રિન્દા જાડેજાએ વધુમાં જણાવ્યું હતું કે, “આવી પ્રવૃત્તિઓ માત્ર સાંસ્કૃતિક અભિવ્યક્તિ પૂરતી મર્યાદિત નથી, પરંતુ સમાજમાં એકતા, પ્રેમ અને વિશ્વાસના બંધનને મજબૂત બનાવે છે.”
આ કાર્યક્રમમાં મુસ્લિમ સમાજની બહેનોએ આવનારા તહેવારને ધ્યાનમાં રાખીને કોમી એકતાનું અનોખું ઉદાહરણ પૂરું પાડ્યું હતું.
પંચમહાલ જિલ્લા પોલીસ પરિવાર દ્વારા જણાવાયું હતું કે ભવિષ્યમાં પણ આવા સાંસ્કૃતિક અને સામાજિક કાર્યક્રમોનું આયોજન કરીને પોલીસ અને સમાજ વચ્ચેનું જોડાણ વધુ ગાઢ કરવામાં આવશે.
ગોધરા ખાતે યોજાયેલી આ મહેંદી સ્પર્ધાએ મહિલાઓને પોતાની કળા રજૂ કરવા માટે નવો મંચ પૂરો પાડવાની સાથે પોલીસ અને સમાજ વચ્ચેના વિશ્વાસ તથા સૌહાર્દને વધુ મજબૂત બનાવવાનો સંદેશ આપ્યો છે.
