ગોધરા,(પંચમહાલ) નવાઝ શેખ :-
Kalam Ki Sarkar News / Vadodara: વડોદરામાં લેબર લાયસન્સ આપવાની કાર્યવાહી કરવા બદલ રૂ.70 હજારની લાંચ માંગવાના મામલે નાયબ શ્રમ આયુક્તની કચેરીના બે અધિકારીઓ એન્ટી કરપ્શન બ્યુરો (ACB)ના છટકામાં ઝડપાયા છે. સુરત ACBની ટીમે વડોદરાના ભુતડીઝાંપા વિસ્તારમાં આવેલી શ્રમયોગી કલ્યાણ ભવન ખાતે કાર્યવાહી કરીને આસિસ્ટન્ટ લેબર કમિશનર દીપક અંબાલાલ ચૌહાણ અને મદદનીશ સરકારી શ્રમ અધિકારી રણજીતસિંહ નટવરસિંહ જાદવને ઝડપી લીધા હતા. છટકા દરમિયાન લાંચની રૂ.70 હજારની સંપૂર્ણ રકમ પણ કબજે કરવામાં આવી હતી.
લેબર લાયસન્સની કાર્યવાહી માટે રૂ.70 હજારની લાંચ માંગાઈ
પ્રાપ્ત માહિતી મુજબ, વડોદરાના ભુતડીઝાંપા વિસ્તારમાં આવેલા શ્રમયોગી કલ્યાણ ભવન ખાતે કાર્યરત નાયબ શ્રમ આયુક્તની કચેરીમાં લેબર લાયસન્સ મેળવવા માટે અરજી કરવામાં આવી હતી.
આ અરજીના અનુસંધાને લેબર લાયસન્સ આપવાની કાર્યવાહી કરવાના બદલામાં આસિસ્ટન્ટ લેબર કમિશનર વર્ગ-1 દીપક અંબાલાલ ચૌહાણ દ્વારા અરજદાર પાસે રૂ.70,000ની લાંચની માંગણી કરવામાં આવી હતી.
જોકે, અરજદાર લાંચની રકમ આપવા ઇચ્છતા ન હોવાથી તેમણે એન્ટી કરપ્શન બ્યુરોનો સંપર્ક કરી ફરિયાદ નોંધાવી હતી.
સુરત ACBએ 14 ઑક્ટોબરે છટકું ગોઠવ્યું
અરજદારની ફરિયાદના આધારે સુરત ACBની ટીમે 14 ઑક્ટોબર, 2026ના રોજ લાંચના છટકાનું આયોજન કર્યું હતું.
છટકા દરમિયાન આસિસ્ટન્ટ લેબર કમિશનર દીપક અંબાલાલ ચૌહાણના કહેવાથી મદદનીશ સરકારી શ્રમ અધિકારી વર્ગ-3 રણજીતસિંહ નટવરસિંહ જાદવે અરજદાર પાસેથી રૂ.70,000ની લાંચની રકમ સ્વીકારી હતી.
લાંચની રકમ સ્વીકારતાં જ ACBની ટીમે રણજીતસિંહ જાદવને સ્થળ પર ઝડપી લીધા હતા. આ દરમિયાન લાંચ પેટે આપવામાં આવેલી રૂ.70,000ની સંપૂર્ણ રકમ પણ રિકવર કરવામાં આવી હતી.
લાંચની રકમ મળ્યાની જાણ કરતાં બીજા અધિકારીને પણ ઝડપી લેવાયા
ACBના છટકા દરમિયાન રણજીતસિંહ જાદવે લાંચની રકમ મળી ગઈ હોવાની જાણ દીપક ચૌહાણને કરી હતી. ત્યારબાદ ACBની ટીમે દીપક અંબાલાલ ચૌહાણને પણ ઝડપી લીધા હતા.
આમ, લેબર લાયસન્સ આપવાની કાર્યવાહી માટે લાંચ માંગવા અને સ્વીકારવાના મામલે નાયબ શ્રમ આયુક્તની કચેરીના બંને અધિકારીઓ ACBના છટકામાં ઝડપાયા હતા. સુરત ACB દ્વારા લાંચની સંપૂર્ણ રકમ કબજે કરી આ મામલે વધુ કાયદેસરની કાર્યવાહી હાથ ધરવામાં આવી છે.
