ગોધરા,(પંચમહાલ) નવાઝ શેખ :-
મધ્ય ગુજરાતના 7 જિલ્લાના 350થી વધુ અધિકારીઓએ લીધી તાલીમ; ખેડૂતોને પ્રમાણિત પ્રાકૃતિક ખેતી સાથે જોડવા પર ભાર
પંચમહાલ: ગુજરાતમાં પ્રાકૃતિક ખેતીને વધુ પ્રોત્સાહન આપવા અને ખેડૂતોની પેદાશોને પ્રમાણિત ઓળખ અપાવવાના હેતુથી વડોદરાના વરણામા સ્થિત ત્રિમંદિર ખાતે ‘નેચરલ ફાર્મિંગ સર્ટિફિકેશન સિસ્ટમ (NFCS)’ વિષયક એક દિવસીય વિશેષ તાલીમ શિબિરનું આયોજન કરવામાં આવ્યું હતું. ગુજરાત પ્રાકૃતિક કૃષિ વિકાસ બોર્ડ દ્વારા આયોજિત આ તાલીમનો મુખ્ય ઉદ્દેશ પ્રાકૃતિક ખેતી કરતા ખેડૂતોની પેદાશોને પ્રમાણિત બનાવી ગ્રાહકો સુધી વિશ્વસનીય રીતે પહોંચાડવાનો હતો.
રાજ્યપાલ શ્રી આચાર્ય દેવવ્રતના માર્ગદર્શન હેઠળ યોજાયેલા આ કાર્યક્રમમાં પ્રાકૃતિક ખેતીને વૈજ્ઞાનિક અને પ્રમાણિત પદ્ધતિ સાથે જોડવા પર વિશેષ ભાર મૂકવામાં આવ્યો હતો. વડોદરા સંયુક્ત (વિસ્તરણ) ખેતી નિયામક શ્રી એમ.એમ. પટેલના માર્ગદર્શન હેઠળ યોજાયેલી આ તાલીમમાં મધ્ય ગુજરાતના વડોદરા, પંચમહાલ, મહીસાગર, છોટાઉદેપુર, ભરૂચ, દાહોદ અને નર્મદા એમ કુલ 7 જિલ્લાઓના 350થી વધુ અધિકારીઓ અને કર્મચારીઓ ઉપસ્થિત રહ્યા હતા.
તાલીમમાં ખેતીવાડી વિભાગ, વિસ્તરણ શાખા, આત્મા (ATMA), બાગાયત વિભાગ તેમજ ગુજરાત પ્રાકૃતિક કૃષિ વિકાસ બોર્ડના અધિકારીઓએ ઉત્સાહપૂર્વક ભાગ લીધો હતો. તાલીમ દરમિયાન અધિકારીઓને **નેચરલ ફાર્મિંગ સર્ટિફિકેશન સિસ્ટમ (NFCS)**ની સમગ્ર પ્રક્રિયા, પ્રમાણપત્ર મેળવવાની પદ્ધતિ અને ખેડૂતોને આ વ્યવસ્થાથી કેવી રીતે જોડવા તે અંગે વિગતવાર માર્ગદર્શન આપવામાં આવ્યું હતું.
*ગુજરાત ઓર્ગેનિક પ્રોડક્ટ સર્ટિફિકેશન એજન્સી (GOPCA)*ના ડાયરેક્ટર શ્રી અનિલ પટેલ તથા તેમની નિષ્ણાત ટીમે સર્ટિફિકેશન પ્રક્રિયાના વિવિધ પાસાઓ અંગે વિસ્તૃત માહિતી આપી હતી. જેમાં ઓનલાઈન પોર્ટલનો ઉપયોગ, પ્રાકૃતિક ખેતીના રાષ્ટ્રીય અને આંતરરાષ્ટ્રીય ધોરણો, ખેડૂતોના સંકલ્પપત્ર અને બાહેધરી ફોર્મની પ્રક્રિયા તેમજ ગ્રામ્ય સ્તરે તાલીમ શિબિરો અને ખેડૂતોની બેઠકોના આયોજન જેવા મહત્વપૂર્ણ વિષયોનો સમાવેશ કરવામાં આવ્યો હતો.
આ તાલીમ પૂર્ણ કર્યા બાદ તમામ અધિકારીઓ પોતાના-પોતાના જિલ્લાઓમાં ખેડૂતોને NFCS સાથે જોડવા માટે માર્ગદર્શન આપશે, જેથી પ્રાકૃતિક ખેતીને વધુ વેગ મળે, ખેડૂતોને તેમની પેદાશોના યોગ્ય ભાવ મળે અને ગ્રાહકો સુધી પ્રમાણિત તથા શુદ્ધ પ્રાકૃતિક ખાદ્ય પદાર્થો પહોંચે.
કાર્યક્રમના અંતે ઉપસ્થિત મહાનુભાવોએ આ પહેલને પ્રાકૃતિક ખેતીના વિકાસ માટે મહત્વપૂર્ણ ગણાવી તેની પ્રશંસા વ્યક્ત કરી હતી.
