ગોધરા,(પંચમહાલ) નવાઝ શેખ :-
Kalam Ki Sarkar News / Delhi: ભારતીય ખેલ જગતમાંથી દુઃખદ સમાચાર સામે આવ્યા છે. એશિયન પેરા ગેમ્સમાં ભારત માટે ત્રણ ગોલ્ડ મેડલ જીતનારા જાણીતા પેરા એથ્લેટ નીરજ યાદવનું 42 વર્ષની વયે અવસાન થયું છે. સમાચાર એજન્સી પીટીઆઈના અહેવાલ અનુસાર, નીરજે દિલ્હીમાં પોતાના નિવાસસ્થાને કથિત રીતે ઝેરનું સેવન કરીને જીવન ટૂંકાવ્યું હતું. બુધવારે દિલ્હીની એક હોસ્પિટલમાં તેમના મૃતદેહનું પોસ્ટમોર્ટમ કરવામાં આવ્યું હતું. જોકે, મૃત્યુના ચોક્કસ સંજોગો અંગે તપાસ ચાલી રહી છે.
ભારતીય પેરા એથ્લેટિક્સ ટીમના હેડ કોચ એસ. સત્યનારાયણે આ ઘટનાની પુષ્ટિ કરતાં ઊંડો શોક વ્યક્ત કર્યો હતો. તેમણે નીરજના નિધનને અત્યંત દુર્ભાગ્યપૂર્ણ ગણાવ્યું હતું. સાથે જ તેમણે જણાવ્યું હતું કે આ પગલાં પાછળના ચોક્કસ કારણ અંગે તેઓ કોઈ અટકળો કરવા માંગતા નથી. તેમના મતે ખેલાડીઓએ જીવનમાં સફળતા અને નિષ્ફળતા બંને પરિસ્થિતિઓનો સંતુલિત મનથી સામનો કરવો જોઈએ.
અહેવાલો મુજબ, ડોપિંગ સસ્પેન્શનને કારણે નીરજ ચાલુ મહિને આઇચી-નાગોયા ખાતે યોજાયેલી એશિયન પેરા ગેમ્સમાં ભાગ લઈ શક્યા નહોતા. સસ્પેન્શન બાદ તેઓ માનસિક અને ભાવનાત્મક તણાવમાં હોવાના દાવા સામે આવ્યા છે. જોકે, તેમના મૃત્યુ અને સસ્પેન્શન વચ્ચે કોઈ સીધો સંબંધ હોવાની સત્તાવાર પુષ્ટિ થઈ નથી.
નીરજ યાદવે આંતરરાષ્ટ્રીય પેરા એથ્લેટિક્સમાં ભારતનું નામ રોશન કર્યું હતું. વર્ષ 2018માં ઇન્ડોનેશિયાના જકાર્તા ખાતે યોજાયેલી એશિયન પેરા ગેમ્સમાં તેમણે જેવલિન થ્રોમાં ગોલ્ડ મેડલ જીત્યો હતો. ત્યારબાદ વર્ષ 2023માં ચીનના હાંગઝોઉ ખાતે યોજાયેલી એશિયન પેરા ગેમ્સમાં જેવલિન થ્રો અને ડિસ્કસ થ્રો એમ બે સ્પર્ધાઓમાં ગોલ્ડ મેડલ મેળવી કુલ ત્રણ સુવર્ણચંદ્રક પોતાના નામે કર્યા હતા.
નીરજનું જીવન અનેક પડકારો સામેના સંઘર્ષનું ઉદાહરણ રહ્યું હતું. માત્ર સાત વર્ષની ઉંમરે તેઓ પોસ્ટ-પોલિયો રેસિડ્યુઅલ પેરાલિસિસથી પ્રભાવિત થયા હતા. શારીરિક મર્યાદાઓ છતાં તેમણે રમતગમત પ્રત્યેનો ઉત્સાહ જાળવી રાખ્યો હતો. શરૂઆતમાં વ્હીલચેર ટેનિસ રમ્યા બાદ તેમણે પેરા એથ્લેટિક્સમાં કારકિર્દી બનાવી હતી.
તેઓ F55 કેટેગરીમાં ભાગ લેતા હતા, જેમાં ખેલાડીઓ બેસીને શોટ પુટ, ડિસ્કસ થ્રો અને જેવલિન થ્રો જેવી ફિલ્ડ સ્પર્ધાઓમાં ભાગ લે છે. પોતાની રમતગમતની કારકિર્દી દરમિયાન ત્રણ ગોલ્ડ મેડલ જીતનાર નીરજ યાદવના નિધનથી ભારતીય પેરા રમતજગતમાં શોકની લાગણી ફેલાઈ છે.
