ગોધરા,(પંચમહાલ) સાજીદ શેખ :-
સુપ્રીમ કોર્ટના મુખ્ય ન્યાયાધીશ જસ્ટિસ સૂર્યકાંતની યુવાઓ અને “કૉક્રોચ” અંગેની ટિપ્પણી બાદ સોશિયલ મીડિયામાં શરૂ થયેલું વ્યંગ્યાત્મક કૅમ્પેઇન ‘Cockroach Janta Party (CJP)’ દેશભરમાં ચર્ચાનું કેન્દ્ર બન્યું છે. જોકે બાદમાં જસ્ટિસ સૂર્યકાંતે સ્પષ્ટતા કરતા જણાવ્યું હતું કે તેમની વાતોને મીડિયાના એક વર્ગ દ્વારા ખોટી રીતે રજૂ કરવામાં આવી હતી.
આ સમગ્ર વિવાદ પછી સોશિયલ મીડિયા પર યુવાઓએ વ્યંગ્ય અને મીમ્સ દ્વારા પ્રતિક્રિયા આપતા ‘કૉક્રોચ જનતા પાર્ટી’ નામે એક ડિજિટલ અભિયાન ઉભું કર્યું છે. આ કૅમ્પેઇન હવે માત્ર મજાક પૂરતું નહીં, પરંતુ યુવાઓમાં રહેલા અસંતોષ, બેરોજગારી અને સિસ્ટમ પ્રત્યેના રોષનું પ્રતિક બની રહ્યું છે.
ઇન્ટરનેટ પર ‘Cockroach Janta Party’ નામથી વેબસાઇટ અને સોશિયલ મીડિયા હેન્ડલ પણ શરૂ કરવામાં આવ્યા છે. વિવિધ મીડિયા રિપોર્ટ્સ મુજબ તેના ઇન્સ્ટાગ્રામ પેજે થોડા જ દિવસોમાં લાખો ફૉલોઅર્સ મેળવી લીધા છે. કેટલાક અહેવાલોમાં આ આંકડો 45 લાખથી 66 લાખ વચ્ચે દર્શાવવામાં આવ્યો છે, જોકે આ આંકડાની સ્વતંત્ર સત્તાવાર પુષ્ટિ હજુ સુધી થઈ નથી.
આ કૅમ્પેઇન પાછળ અભિજીત ડિપકે નામના યુવકનું નામ સામે આવી રહ્યું છે, જેણે તેને એક વ્યંગ્યાત્મક ડિજિટલ મૂવમેન્ટ તરીકે શરૂ કર્યું હોવાનું જણાવાય છે. સોશિયલ મીડિયા પર વાયરલ થયેલા પોસ્ટ્સ, મીમ્સ અને “યુવાનો માટેની રાજનીતિ” જેવા સૂત્રોના કારણે આ અભિયાન Gen-Zમાં ખાસ ચર્ચાનો વિષય બન્યું છે.
જોકે, રાજકીય વિશ્લેષકો અને સોશિયલ મીડિયા યુઝર્સનો એક વર્ગ આ સમગ્ર કૅમ્પેઇનને માત્ર “વાયરલ ટ્રેન્ડ” ગણાવી રહ્યો છે. કેટલાક લોકો તેના ફૉલોઅર્સ અને લોકપ્રિયતાને લઈને સવાલો પણ ઉઠાવી રહ્યા છે. સોશિયલ મીડિયા પર તેની લોકપ્રિયતા જેટલી ઝડપથી વધી છે, એટલી જ ઝડપથી તેના પાછળ રાજકીય સ્ટ્રેટેજી કે ડિજિટલ માર્કેટિંગ હોવાની ચર્ચાઓ પણ તેજ બની છે.