ગોધરા,(પંચમહાલ) નવાઝ શેખ :-
જયપુર: નેશનલ ટેસ્ટિંગ એજન્સી (NTA) દ્વારા આયોજિત ઓલ ઈન્ડિયા આયુષ પોસ્ટ ગ્રેજ્યુએટ એન્ટ્રન્સ ટેસ્ટ (AIAPGET) દરમિયાન જયપુરના શ્રી સત્ય સાઈ પીજી કોલેજ પરીક્ષા કેન્દ્ર પર વીજળી ગુલ થતાં ગેરવ્યવસ્થા સર્જાઈ હતી. પ્રથમ શિફ્ટમાં વીજળી જતી રહેવાના કારણે કુલ 192 ઉમેદવારોમાંથી 49 ઉમેદવારો પરીક્ષા પૂર્ણ કરી શક્યા નહોતા.
વીજળી ગુલ થતાં પરીક્ષાની ગોપનીયતા અંગે ઉઠ્યા સવાલો
પરીક્ષાર્થીઓએ આક્ષેપ કર્યો હતો કે વીજળી ગુલ થવાના સમય દરમિયાન પરીક્ષાની ગોપનીયતા જળવાઈ રહી નહોતી. અંધારામાં પ્રશ્નપત્ર અંગે ઉમેદવારો વચ્ચે ચર્ચા થઈ હોવાના કારણે નકલ જેવી સ્થિતિ ઊભી થઈ હોવાનો દાવો કરવામાં આવ્યો હતો. ઉમેદવારોએ એવી પણ રજૂઆત કરી હતી કે બાદમાં વધારાનો સમય આપવામાં આવ્યો હોવા છતાં અગાઉ પરીક્ષા પૂર્ણ કરી ચૂકેલા ઉમેદવારોની સરખામણીએ તેમને યોગ્ય લાભ મળ્યો નહોતો.
NTAએ 49 અસરગ્રસ્ત ઉમેદવારો માટે ફરી પરીક્ષાની જાહેરાત કરી
ઉમેદવારો દ્વારા પ્રથમ શિફ્ટની પરીક્ષા રદ કરીને ફરીથી પરીક્ષા યોજવાની માંગ કરવામાં આવી હતી. મળતી માહિતી મુજબ, સવારે 10:20 વાગ્યે વીજળી ગુલ થઈ હતી અને જનરેટર શરૂ કરવામાં સમય લાગતા પરીક્ષા પ્રભાવિત થઈ હતી.
આ મામલે NTAએ સંજ્ઞાન લેતા સોશિયલ મીડિયા પ્લેટફોર્મ X પર માહિતી જાહેર કરી હતી કે 22 ઓગસ્ટ 2026ના રોજ દેશભરના 200 પરીક્ષા કેન્દ્રો પર કુલ 35,837 ઉમેદવારો માટે AIAPGET પરીક્ષા યોજાઈ હતી. તેમાંથી 35,788 ઉમેદવારો સફળતાપૂર્વક પરીક્ષા આપી શક્યા હતા.
જોકે, જયપુરના શ્રી સત્ય સાઈ પીજી કોલેજ કેન્દ્ર પર 192માંથી 49 ઉમેદવારો વીજળી ગુલ થવાના કારણે પરીક્ષા પૂર્ણ કરી શક્યા નહોતા. NTA મુજબ આ ખામી પરીક્ષા માટેની એજન્સી M/S Eduquity Career Technologies Private Limitedના સ્તરે થઈ હતી.
1 સપ્ટેમ્બરે જયપુરમાં ફરી પરીક્ષા યોજાશે
NTAએ અસરગ્રસ્ત ઉમેદવારોને પડેલી અસુવિધા બદલ દિલગીરી વ્યક્ત કરી છે. હવે આ 49 ઉમેદવારો માટે 1 સપ્ટેમ્બર 2026ના રોજ સવારે 10 વાગ્યે જયપુરની રાજસ્થાન કોલેજ ઓફ એન્જિનિયરિંગ ફોર વુમન ખાતે ફરી પરીક્ષા યોજવામાં આવશે.
આ માટે ઉમેદવારોને નવા એડમિટ કાર્ડ જારી કરવામાં આવશે.
