પંચમહાલ જિલ્લામાં આજે કોરોનાનો એક પણ નવો કેસ નહીં….

ગોધરા,

કલમ કી સરકાર :- સાજીદ શેખ

જિલ્લામાં નોવેલ કોરોના વાયરસ સંક્રમણના કુલ કેસોની સંખ્યા 9, હાલમાં સક્રિય કેસોની સંખ્યા 7

1212 વ્યક્તિઓએ ક્વોરેન્ટાઈનનો સમયગાળો પૂર્ણ કર્યો,
317 વ્યક્તિઓ હજી ક્વોરેન્ટાઈનમાં
13 વ્યક્તિઓ આઈસોલેશન વોર્ડમાં ઓબ્ઝર્વેશન હેઠળ

અત્યાર સુધી કુલ 95 સેમ્પલનું પરીક્ષણ…..9 પોઝિટીવ, 54 નેગેટીવ રહ્યા

પંચમહાલ જિલ્લામાં આજે કોરોનાનો એક પણ નવો કેસ સામે આવ્યો નથી. ગઈ કાલે ગોધરા શહેરના શહેરા ભાગોળ વિસ્તારના 33 વર્ષીય યુવક અને લુણાવાડા રોડ પરની ઝુલેલાલ સોસાયટીના 23 વર્ષીય યુવકનો કોરોના ટેસ્ટ પોઝિટીવ આવતા કોવિડ-19ના કુલ કેસોની સંખ્યા 9 અને સક્રિય કેસોની સંખ્યા 7 નોંધાઈ હતી. બંને કોરોના પોઝિટીવ યુવકોની ગોધરા સિવિલ ખાતે આવેલી કોવિડ-19 હોસ્પિટલ ખાતે સારવાર ચાલી રહી છે અને તેમની તબિયત સ્થિર છે. જિલ્લામાં કોવિડ-19ના કારણે થયેલ મૃત્યુની સંખ્યા 2 થવા પામી છે. જિલ્લામાંથી હાલની સ્થિતિએ કુલ 95 સેમ્પલ ચકાસણી અર્થ મોકલવામાં આવ્યા છે, જે પૈકી 9 રિપોર્ટ પોઝિટીવ આવ્યા છે, 54 ના રિપોર્ટ નેગેટીવ રહ્યા છે. કોવિડ-19 હોસ્પિટલના આઈસોલેશન વોર્ડમાં કુલ 13 દર્દીઓ હાલમાં ઓબ્ઝર્વેશન હેઠળ છે.

ગોધરાના 680 ઘરોના કુલ 2700 વ્યક્તિઓને ક્લસ્ટર કન્ટેઈન કરાયા

જિલ્લાના તમામ પોઝિટીવ કેસ ગોધરા શહેરના હોવાથી પોઝિટીવ કેસો ધરાવતા વિસ્તારની કોરોના પ્રભાવિત કલસ્ટર તરીકે ઓળખ કરી સરકારની માર્ગદર્શિકા પ્રમાણે ક્લસ્ટર કન્ટેઈન કરવામાં આવ્યા છે. આ વિસ્તારો પૈકી રબ્બાની મહોલ્લા વિસ્તારમાં કોરોનાના 2 પોઝિટીવ કેસ મળ્યા છે. આ વિસ્તારના 74 ઘરોમાં 448 વ્યક્તિઓ રહે છે. ક્રિષ્ના એપાર્ટમેન્ટ,ભગવતનગર વિસ્તારમાં 2 કેસો મળ્યા છે. અહીં કલસ્ટર કન્ટેઈનમેન્ટ પ્લાન હેઠળ કુલ 124 ઘરોમાં 401 વ્યક્તિઓને કલસ્ટર કન્ટેઈન કરાયા છે. પ્રભાવિત વિસ્તાર મુસ્લિમ સોસાયટી-બીના 103 ઘરોમાં 409 વ્યક્તિઓનો અને મદની મહોલ્લામાં 103 ઘરોના 451 લોકોનો સમાવેશ થાય છે. જ્યારે નવા પ્રભાવિત વિસ્તાર સિવિલના સ્ટાફ નર્સના રહેણાંક વિસ્તારની આજુબાજુમાં વાવડી બુઝર્ગના 62 ઘરોના 264 વ્યક્તિઓને અને ઝુલેલાલ સોસાયટીના 214 ઘરના કુલ 727 વ્યક્તિઓને કલસ્ટર કન્ટેઈન કરવામાં આવ્યા છે.